شعر ایام بستری حضرت زهرا (س)
قلوب عاشقی هجران شراره سی داغلار
فراق یارینی تصویر ایدنده یار آغلار
تصور ایله او وقتین غم و مُصیبتینی
علی باخاباخا زهرا ائدور وصیتینی
ازلده عرض ایلدی ای عوالمه سلطان
دعالریم اثر ایلوب جانیم سنه قربان
بو دودمانه فلک خاک درد و غم اَلَدی
بیراللی ذکر قنوتی خدا قبول ایلدی
بئله سیزیلداماقون قلب عالمی داغلور
سن آغلینده عم اوغلی یارالاریم آغلور
سن آغلینده دییر یِر گوی آغلاما حیدر
دیزون قوجاخلاما ای شاه فاتح خیبر
بو ناله قلبیمه هر یاره دن اولور کاری
قولومدا قاخمیری گوز یاشوی سیلم باری
اجازه ور سنه تخصیریله دییم سوزومی
وصییت ایلییم اوندان صورا یوموم گوزومی
سن اولمیینده بو ایوده بالالار آغلیاجاق
حسنده سن کیمی اوز دیزلرین قوجاخلیاجاق
گورنده خیره باخیر بیر یره دانیشمیر,علی
ترحم ائت,دله دوت, سن اونی دانیشدیر علی
او گونکه ظلموله ثانی جهانه اود ووردی
یره ییخیلماقیمی کوچه ده حسن گوردی
هوسلنوبدی گویول صوتوه قرائتوه
جانیم فدا اولا خوش لحنوه تلاوتوه
بورا مدینه دی کوفیله فرقی چوخ چوخدی
خدا کلامین اوخی,سنگسار ائدن یوخدی
حسیندن نگرانم بونی ئوزون بولوسن
ئوزونده من تک عموغلی حسینی چوخ سویوسن
بیر اللی اوندان اوتور سعی و اهتمام ائلدیم
خدایه شکر اولا پیراهنین تمام ائلدیم
یازاندا بو سوزی “فرشی” گلوبدی فریاده
اولوب بو شعره سبب مهدی حسین زاده
یتوبله بو قاپیدا عز و شوکت و شرفه
ئوزون براتلرین یاز چاغیر علی نجفه
بهنام فرشی